काठमाडौं ।नेपाल कम्युनिस्ट पार्टी (नेकपा)का संस्थापक महासचिव पुष्पलालको ४८औँ स्मृति दिवस आज देशभर विभिन्न कार्यक्रम आयोजना गरी मनाइँदै छ।
विसं २००६ वैशाखमा निरञ्जनगोविन्द वैद्य, नारायणविलास जोशी, नरबहादुर कर्माचार्य र मोतीदेवी शाक्यसँग मिलेर भारतको कोलकातामा उनले नेपाल कम्युनिस्ट पार्टी (नेकपा) स्थापना गरेका थिए।
नेकपा स्थापना गर्नुअघि विसं १९९८ मा प्रेमबहादुर कंसाकार, शम्भुराम श्रेष्ठ, सूर्यबहादुर भारद्वाज र रामराजासँग मिलेर नेपाली प्रजातान्त्रिक संघ गठन गरी प्रजातान्त्रिक आन्दोलनमा सक्रिय भूमिका निर्वाह गरेका थिए।
विसं १९८१ असार १५ गते रामेछापमा जन्मिएका पुष्पलाल पिता भक्तलाल र आमा तुलसीकुमारीका माहिला छोरा थिए। सहिद गंगालालका भाइसमेत रहेका उनले लामो समय प्रवासमा बसेर नेकपाका गतिविधिलाई अघि बढाएका थिए।
पुष्पलालले कार्ल मार्क्स र फ्रेडरिक एङ्गेल्सद्वारा लिखित ‘कम्युनिस्ट मेनिफेस्टो’ पहिलोपटक नेपाली भाषामा अनुवाद गरेका थिए। साथै, विभिन्न कृति र लेखमार्फत नेपाली समाजको वर्गीय विश्लेषण प्रस्तुत गर्दै वामपन्थी राजनीतिक चिन्तनलाई स्थापित गर्न महत्वपूर्ण योगदान दिएका थिए।
उनले नेपाली कांग्रेसलगायत प्रजातान्त्रिक शक्तिसँग सहकार्य गर्दै संयुक्त जनआन्दोलनमार्फत पञ्चायती व्यवस्था अन्त्य गर्नुपर्ने धारणा अघि सारेका थिए। विसं २०३५ साउन ७ गते भारतको नयाँदिल्लीमा उपचारका क्रममा उनको निधन भएको थियो।
