काठमाडौं । अर्थमन्त्री स्वर्णिम वाग्ले तीन दिने भारत भ्रमण सम्पन्न गरी शनिबार साँझ स्वदेश फर्किएका छन् ।
बिहीबार भारत प्रस्थान गरेका मन्त्री वाग्लेले भ्रमणका क्रममा भारतीय अर्थमन्त्री निर्मला सीतारमण र विदेशमन्त्री एस जयशंकरसँग भेटवार्ता गरेका थिए ।
भेटका क्रममा मन्त्री वाग्लेले जलवायु न्यायका विषयमा भारतको सहयोग र साथका लागि आग्रह गरेका थिए । साथै, वर्तमान सरकार सुशासनप्रति प्रतिबद्ध रहेको उल्लेख गर्दै नेपालमा भारतीय लगानी बढाउन भारतीय पक्षलाई आग्रह गरेका थिए ।
विदेशमन्त्री जयशंकरसँगको भेटमा वाग्लेले आर्थिक तथा राजनीतिक सहकार्यका विषयमा छलफल गरेका थिए । भेटका क्रममा उनले भोटेकोशी क्षेत्रमा आएको बाढीपछि राहत तथा उद्धारका लागि भारत सरकारले गरेको सहयोगप्रति धन्यवादसमेत व्यक्त गरेका थिए।
