काठमाडौं — सूचना तथा सञ्चारमन्त्री डा. विक्रम तिमिल्सिनाले बाजुराको पर्यटकीय तथा धार्मिक क्षेत्र बडीमालिकामा तत्काल टेलिफोन र इन्टरनेट सेवा विस्तार गर्न नेपाल टेलिकमलाई निर्देशन दिएका छन्।
बडीमालिका क्षेत्रमा लामो समयदेखि दूरसञ्चार सेवा अभाव रहेको विषयलाई गम्भीर रूपमा लिँदै मन्त्री तिमिल्सिनाले आवश्यक उपकरण तत्काल पुर्याएर सेवा सञ्चालन गर्न निर्देशन दिएका हुन्। सडकमार्फत सामग्री ढुवानी गर्न कठिन भएकाले नेपाली सेनाको हेलिकप्टरमार्फत उपकरण ढुवानी गर्ने व्यवस्था मिलाउन पनि उनले आग्रह गरेका छन्।
शुक्रबार मन्त्रालयमा भएको छलफलमा नेपाल टेलिकमले साउन महिनाभित्र बडीमालिकामा टेलिफोन सेवा सञ्चालनमा ल्याउने प्रतिबद्धता जनाएको छ। टेलिकमका अनुसार टावर निर्माणका लागि आवश्यक सामग्री धनगढीसम्म पुगिसकेको छ र हेलिकप्टर उपलब्ध भएलगत्तै निर्माण कार्य तीव्र बनाइनेछ।
सरकारले देशभरका दुर्गम तथा पर्यटकीय क्षेत्रमा दूरसञ्चार सेवा विस्तारलाई प्राथमिकतामा राख्दै प्रधानमन्त्री तथा मन्त्रिपरिषद्को कार्यालयसँग निरन्तर समन्वय गरिरहेको मन्त्रालयले जनाएको छ।
यसैक्रममा सञ्चारमन्त्री तिमिल्सिनाले प्रधानमन्त्रीका सूचना, सञ्चार तथा प्रविधि सल्लाहकार विवेक मिश्रसँग भेट गरी बडीमालिकासहित दुर्गम क्षेत्रमा इन्टरनेट सेवा विस्तार, अनलाइन सट्टेबाजी (बेटिङ) एप नियन्त्रण तथा अनलाइन ठगी रोकथामका विषयमा पनि छलफल गरेका छन्।
मन्त्री तिमिल्सिनाले बडीमालिका नगरपालिकाका नगरप्रमुख अमरबहादुर खड्कासँग समेत भेट गरी स्थानीय पूर्वाधार, सडक पहुँच तथा सञ्चार सेवा विस्तारका आवश्यकताबारे जानकारी लिएका छन्।
सरकारको डिजिटल पहुँच विस्तार गर्ने नीतिअनुसार नेपाल टेलिकमले ४,२०० मिटर उचाइमा रहेको बडीमालिका मन्दिर क्षेत्रमा फोरजी सेवा सञ्चालन गर्ने लक्ष्य राखेको छ। साथै सगरमाथा आधार शिविर क्षेत्रमा पनि फोरजी सेवा विस्तारका लागि अध्ययन कार्य अघि बढाइएको टेलिकमले जनाएको छ।
हालै डोल्पाको त्रिपुरासुन्दरी नगरपालिका–६ स्थित ल्हान तथा ठूलीभेरी नगरपालिका–१ दुनै क्षेत्रमा करिब ३,९०० मिटर उचाइमा फोरजी सेवा सञ्चालनमा आइसकेको छ। त्यस्तै ताप्लेजुङको ओलाङचुङगोला क्षेत्रमा पनि ३,४०० मिटर उचाइमा फोरजी सेवा विस्तार भइसकेको छ।
दूरसञ्चार सेवाको पहुँच विस्तार र डिजिटल विभाजन न्यूनीकरण गर्ने लक्ष्यअनुसार सरकारले देशभर थप करिब १,६०० नयाँ मोबाइल टावर तथा सम्बन्धित पूर्वाधार निर्माण प्रक्रिया अघि बढाइसकेको छ। ग्रामीण क्षेत्रमा सेवा विस्तार र गुणस्तर सुधारका लागि नेपाल टेलिकमले आगामी आर्थिक वर्षमा मात्रै करिब ६ अर्ब रुपैयाँभन्दा बढी लगानी गर्ने तयारी गरेको छ।
