काठमाडौं । काठमाडौंको सुन्दरीजल क्षेत्रमा लागूऔषध ओसारपसार नियन्त्रण अभियानअन्तर्गत प्रहरीले करिब ३० किलो गाँजासहित दुई जनालाई पक्राउ गरेको छ।
पक्राउ पर्नेमा सिन्धुपाल्चोकको मेलम्ची नगरपालिका–३ हैबुङ घर भई हाल काठमाडौंको कागेश्वरी मनहरा नगरपालिका–२ आलापोट बस्दै आएका २६ वर्षीय अवतार सिंह तामाङ र काठमाडौंको सुन्दरीजल निवासी ५४ वर्षीय अम्बक तामाङ रहेका छन्।
काठमाडौं उपत्यका प्रहरी कार्यालयका अनुसार गएराति करिब १ बजे सुन्दरीजल क्षेत्रमा शंकास्पद अवस्थामा बा ८३ प ४३७७ नम्बरको मोटरसाइकल जाँच गर्ने क्रममा उनीहरूको साथबाट करिब ३० किलो गाँजा बरामद गरिएको हो। प्रहरीले गाँजा ओसारपसारमा प्रयोग गरिएको मोटरसाइकलसमेत नियन्त्रणमा लिएको जनाएको छ।
दुवै जनालाई थप अनुसन्धानका लागि प्रहरी वृत्त बौद्धको हिरासतमा राखिएको छ। उनीहरूमाथि लागूऔषध ओसारपसारसम्बन्धी कसुरमा आवश्यक अनुसन्धान अघि बढाइएको प्रहरीले जनाएको छ।
