काठमाडौं । भारत भ्रमणमा रहेका राष्ट्रिय स्वतन्त्र पार्टी (रास्वपा) का सभापति रवि लामिछानेले भारतीय प्रधानमन्त्री नरेन्द्र मोदीसँग भेटवार्ता गरेका छन् । भेटपछि प्रधानमन्त्री मोदीले सामाजिक सञ्जालमार्फत लामिछानेसँगको तस्बिर सार्वजनिक गर्दै नेपाल–भारत सम्बन्धलाई अझ उचाइमा पुर्याउने प्रतिबद्धता व्यक्त गरेका छन् ।
मोदीले लामिछानेसँगको भेटप्रति खुशी व्यक्त गर्दै साझा समृद्धि र उज्ज्वल भविष्यका लागि नजिकको सहकार्य आवश्यक रहेको उल्लेख गरेका छन् । उनले नेपाललाई भारतको ‘छिमेकी पहिलो’ नीतिअन्तर्गत प्रमुख साझेदारका रूपमा लिएको स्पष्ट पारेका छन् ।
त्यस्तै, प्रधानमन्त्री मोदीले नेपालसँगको ऐतिहासिक, सांस्कृतिक, आर्थिक तथा जनस्तरीय सम्बन्धलाई थप सुदृढ बनाउन भारत प्रतिबद्ध रहेको बताएका छन् । उनले नयाँ राजनीतिक नेतृत्वसँग सहकार्य गर्दै द्विपक्षीय सम्बन्धलाई अझ प्रभावकारी बनाउने अपेक्षा समेत व्यक्त गरेका छन् ।
रास्वपा सभापति लामिछाने नेतृत्वको प्रतिनिधिमण्डलले भारतमा विभिन्न राजनीतिक नेतृत्वसँग पनि भेटवार्ता गरिरहेको छ । मोदीसँगको भेटलाई दुई देशबीचको राजनीतिक संवाद र सहकार्यलाई थप मजबुत बनाउने महत्वपूर्ण अवसरका रूपमा हेरिएको छ ।
