काठमाडौं । लगातारको वर्षाका कारण विभिन्न स्थानमा पहिरो र सडक भासिएपछि पृथ्वी राजमार्गमा सवारीसाधनको आवागमन पूर्ण रूपमा बन्द गरिएको छ ।
जिल्ला प्रशासन कार्यालय धादिङका अनुसार विगत दुई दिनदेखि धादिङ तथा आसपासका क्षेत्रमा निरन्तर वर्षा भइरहेको छ । वर्षाका कारण पृथ्वी राजमार्गअन्तर्गत कृष्णभीरलगायतका स्थानमा पहिरो खसेको तथा धारापानीसहितका क्षेत्रमा सडक भासिएपछि यातायात प्रभावित भएको हो ।
यस्तै, नारायणगढ–मुग्लिन सडकखण्डका विभिन्न स्थानमा समेत पहिरो खसेपछि जिल्ला प्रशासन कार्यालय चितवनले अर्को सूचना जारी नभएसम्मका लागि सडक आवागमन बन्द गरेको जनाएको छ ।
मौसम विज्ञान विभागले आगामी केही दिनसम्म देशका विभिन्न स्थानमा भारीदेखि अति भारी वर्षा हुनसक्ने पूर्वानुमान गरेको छ । थप विपद्जन्य जोखिम उत्पन्न हुनसक्ने अवस्थालाई मध्यनजर गर्दै यात्रु तथा सवारीसाधनको सुरक्षा सुनिश्चित गर्न पृथ्वी राजमार्गमा चल्ने सबै सवारीसाधनको आवागमनमा अर्को सूचना नभएसम्म पूर्ण रोक लगाइएको प्रशासनले जनाएको छ ।
सम्बन्धित निकायले जोखिमयुक्त अवस्थामा यात्रा नगर्न तथा प्रशासनबाट जारी सूचनाको पालना गर्न सर्वसाधारणलाई आग्रह गरेको छ ।
