काठमाडौं । चर्चित अभिनेत्री तथा निर्देशक रेखा थापा को निर्देशनमा बनेको चलचित्र ‘माया भनेकै यस्तो होला’ आगामी भदौ २६ गते, हरितालिका तीज को अवसर पारेर देशभर प्रदर्शनमा आउने भएको छ।
प्रेम, सम्बन्ध र पारिवारिक भावनालाई केन्द्रमा राखेर निर्माण गरिएको यो चलचित्रलाई दर्शकमाझ भावनात्मक कथावस्तु बोकेको नयाँ प्रस्तुति रूपमा हेरिएको छ।
चलचित्रको निर्माण हरिनारायण श्रेष्ठ र मायादेवी श्रेष्ठले गरेका हुन्। कलाकारहरूमा मदनकृष्ण श्रेष्ठ, दिल श्रेष्ठ, सृष्टि श्रेष्ठ, नीति शाह, नम्रता श्रेष्ठ, उषा खड्गी, लक्ष्मी गिरी, विशाल पहाडी, संगम भण्डारी, रवि डंगोल, सुनिता श्रेष्ठ र विनोद पौडेललगायतको अभिनय रहेको छ।
पटकथा ध्रुव लम्सालले लेखेका हुन् भने छायांकन सुदीप बरालले गरेका छन्। चलचित्रको वितरण रिच, एप्पल र एफडीले गर्ने भएका छन्।
निर्देशक थापाका अनुसार, ‘यो केवल प्रेमकथा मात्र होइन, जीवनका विभिन्न आयाम समेटिएको कथा हो। दर्शकले यसमा आफ्नै अनुभूति भेट्नेछन्।’
