काठमाडौं । सिनेमा **‘लज्जावती’**को ट्रेलर सार्वजनिक गरिएको छ। साउन १५ अर्थात् खिर खाने दिनको अवसरमा काठमाडौंमा आयोजित कार्यक्रममा निर्माण टिमले ट्रेलर सार्वजनिक गरेको हो।
सार्वजनिक ट्रेलरले प्रेम, विश्वास, धोका, विछोड र त्यसपछि जीवनमा आइपर्ने संघर्ष तथा उतारचढावलाई केन्द्रमा राखेको छ। निर्देशक राजबहादुर सानेले दुई प्रेमिल जोडीको कथामार्फत मानवीय सम्बन्ध, सामाजिक दबाब र जीवनका चुनौतीलाई भावनात्मक ढंगले प्रस्तुत गरेका छन्।
सिनेमामा मुकुन भुसाल र जानुका विश्वकर्मा एक जोडीका रूपमा देखिएका छन् भने श्रीकृष्ण निरौला र मेनुका माझी अर्को प्रेमिल जोडीको भूमिकामा छन्। ट्रेलरमा सुरुमा घनिष्ठ देखिने उनीहरूको सम्बन्ध समयसँगै अभाव, पारिवारिक परिस्थिति र सामाजिक दबाबका कारण जटिल मोडमा पुग्दै गएको देखाइएको छ।
आगामी २९ साउनदेखि देशभर प्रदर्शनमा आउने सिनेमाले प्रेम सम्बन्धमा आउने उतारचढाव र संघर्षलाई यथार्थपरक रूपमा चित्रण गर्ने निर्देशक सानेले बताएका छन्।
सिनेमामा मुकुन भुसाल, श्रीकृष्ण निरौला, जानुका विश्वकर्मा, मेनुका माझी, केशव रिजाल, धीरेन शाक्य, प्रिया रिजाल, हिउँवाला गौतम, विशाल पहारी, सिपी पौडेल, आरआर खड्का, विनोद श्रेष्ठ, दीपक थापा र काजल भुजेलको अभिनय रहेको छ।
आहा फिल्म्स प्रालिको प्रस्तुतिमा निर्माण भएको यस सिनेमाका प्रस्तुतकर्ता सौरभ वली हुन्। कमलप्रसाद शर्मा र सन्दीप कुमार रोकाया निर्माता रहेको सिनेमाका कार्यकारी निर्माता दिनेश बुढाथोकी हुन्।
सिनेमाको सम्पादन तारा थापा ‘किम्भे’, द्वन्द्व निर्देशन देव महर्जन र छायांकन दिव्यराज सुवेदीले गरेका छन्। चलचित्रको वितरण कुबेर सिने डिस्ट्रिब्युसनले गर्नेछ।
