काठमाडौ । नमोबुद्ध नगरपालिकाको आयोजनामा सामाजिक विषयवस्तुमा आधारित सचेतनामूलक सडक नाटक ‘सहीछाप’ प्रदर्शन गरिएको छ।
नगरभित्रका विद्यालय उमेरका बालबालिका, युवा वर्ग तथा स्थानीय समुदायलाई सामाजिक विकृतिविरुद्ध जागरूक बनाउने उद्देश्यले बिहीबार असार ११ गते नमोबुद्ध नगरपालिका–४, भकुण्डेबेसीस्थित जनक माध्यमिक विद्यालयको प्राङ्गणमा नाटक मञ्चन गरिएको हो।
नाटकमा नेपाली समाजमा अझै चुनौतीका रूपमा रहेका बालविवाह, लागूपदार्थ दुव्र्यसन, साइबर अपराध तथा अन्य समसामयिक सामाजिक विसङ्गतिलाई मुख्य विषयवस्तु बनाइएको थियो। सूचना, मनोरञ्जन र चेतनालाई एकसाथ प्रस्तुत गरिएको नाटकले समाजमा सकारात्मक परिवर्तन ल्याउन महत्त्वपूर्ण भूमिका खेल्ने अपेक्षा गरिएको छ।
नाटक अवलोकनपछि प्रतिक्रिया दिँदै जनक बहुमुखी क्याम्पसका क्याम्पस प्रमुख हरिहर अधिकारीले ‘सहीछाप’ अत्यन्त समयसापेक्ष र जनचेतनामूलक रहेको बताए।
उनले भने, “नाटक ‘सहीछाप’ एकदमै जनचेतनामूलक र समयसान्दर्भिक छ। अहिले हाम्रो समाजमा व्याप्त बालविवाह तथा अन्य सामाजिक समस्यालाई उत्कृष्ट ढङ्गले प्रस्तुत गरिएको छ। यो नाटक अभिभावक, विद्यार्थी र शिक्षक सबैले हेर्नुपर्ने खालको बनेको छ।”
नाटकको उद्देश्यबारे प्रकाश पार्दै नमोबुद्ध नगरपालिकाको महिला, बालबालिका तथा समाज कल्याण शाखा प्रमुख तारादेवी सुनुवारले अझै पनि नगर क्षेत्रमा बालविवाहको समस्या विद्यमान रहेको बताइन्।
उनले भनिन्, “अभिभावकहरूको अवस्था नाटकमा देखाइएजस्तै छ। पछिल्लो समय सामाजिक सञ्जालको बढ्दो प्रयोग र त्यसबाट निम्तिन सक्ने जोखिमबारे जनचेतना फैलाउन आवश्यक भएकाले हामीले यो नाटक प्रदर्शन गरेका हौँ।”
‘आदिइत्यादि’ को प्रस्तुति रहेको नाटकलाई रङ्गकर्मी तथा निर्देशक पुरु लम्सालले लेखन तथा निर्देशन गरेका हुन्। नाटकमा वरिष्ठ कलाकार प्रभाकरदेव शर्मा, ‘खुपीका बाउ’ का रूपमा परिचित कमलमणि नेपाल, ‘गौरी’ का रूपमा चर्चित अनामिका लामिछाने, सागर कार्की, सेविता अधिकारी, रूपेश मण्डल र अञ्जु खड्का लगायतका कलाकारहरूको अभिनय रहेको थियो।
