काठमाडौँ । अमेरिका र इजरायलको संयुक्त हवाई आक्रमणमा मृत्यु भएका इरानका पूर्व सर्वोच्च नेता आयातुल्लाह अली खामेनीको निधन भएको तीन महिनापछि औपचारिक अन्त्येष्टि गर्ने तयारी सुरु गरिएको छ।
खामेनीको गत फेब्रुअरी २८ मा तेहरानस्थित निवासलाई लक्षित गरी गरिएको हवाई आक्रमणमा मृत्यु भएको इरानी सरकारी सञ्चारमाध्यमले जनाएको थियो।
इस्लामिक परम्पराअनुसार मृत्यु भएको केही दिनभित्रै अन्त्येष्टि गरिने चलन रहे पनि इरान सरकारले विशेष परिस्थितिका कारण अन्त्येष्टि कार्यक्रम स्थगित गरेको थियो।
इरानको सरकारी सञ्चारमाध्यमसँग कुरा गर्दै तेहरानका उपमेयर मोहम्मद अमिन ताभाकोली जादेहले शवयात्रासहित ‘सुपुर्द–ए–खाक’ (अन्त्येष्टि) कार्यक्रम आयोजना गरिने र त्यसको तयारी विभिन्न सहरमा भइरहेको जानकारी दिएका छन्।
उनका अनुसार अन्त्येष्टि कार्यक्रम शिया मुस्लिम समुदायका लागि विशेष महत्व राख्ने शोक महिनाको सुरुआत अर्थात् ९ मुहर्रममा आयोजना गर्ने तयारी गरिएको छ। चन्द्र पात्रो (हिजरी क्यालेन्डर) अनुसार यो मिति मध्य जुनतिर पर्न सक्ने बताइएको छ।
हिजरी पात्रोको पहिलो महिना मुहर्रमलाई विशेषगरी शिया मुस्लिम समुदायले शोक र सम्झनाको समयका रूपमा मनाउने गर्दछन्। यसै अवधिमा खामेनीको अन्तिम संस्कार गरिने तयारीलाई इरानले राष्ट्रिय महत्वको कार्यक्रमका रूपमा अघि बढाएको जनाएको छ।
