काठमाडौं । श्रम संस्कृति पार्टीका अध्यक्ष हर्क साम्पाङ राई ले संविधान संशोधनसम्बन्धी विस्तृत प्रस्ताव सार्वजनिक गरेका छन् ।
‘संविधान संशोधन कार्यशाला २०८३’ सार्वजनिक गर्दै उनले प्रत्यक्ष निर्वाचित कार्यकारी राष्ट्रपतीय प्रणाली लागू गर्नुपर्ने प्रस्ताव अघि सारेका हुन् । प्रस्तावमा जनताबाट प्रत्यक्ष निर्वाचित कार्यकारी प्रमुख रहने व्यवस्था गरिनुपर्ने उल्लेख गरिएको छ ।
कार्यकारी प्रमुखले मन्त्रिपरिषद् गठन गर्ने र मन्त्री चयन गर्दा सभ्यता, जाति, समुदाय तथा लिङ्गका आधारमा समावेशी चरित्र सुनिश्चित गर्नुपर्ने प्रस्तावमा भनिएको छ । साथै सरकार सञ्चालन, कानुन निर्माण, कार्यान्वयनको अनुगमन, मूल्याङ्कन तथा निरीक्षण गरी सरकारलाई सुझाव दिने स्पष्ट कार्यविधि तय गर्नुपर्ने उल्लेख गरिएको छ ।
त्यस्तै, कार्यकारी प्रमुख निरंकुश बनेमा महाअभियोग लगाउने र संसदबाट पारित भएमा पदमुक्त गर्ने व्यवस्था पनि प्रस्तावमा समावेश गरिएको छ ।
