काठमाडौँ । भारतमा पछिल्लो दुई महिनामा चिनीको मूल्य करिब ४० प्रतिशतले बढेपछि सरकारले १० लाख मेट्रिक टन कच्चा चिनी भन्सार शुल्कबिनै आयात गर्न अनुमति दिएको छ।
आन्तरिक बजारमा बढ्दो मूल्य र घट्दो आपूर्ति नियन्त्रण गर्ने उद्देश्यले सरकारले यस्तो निर्णय गरेको हो। भन्सार शुल्कमुक्त आयातको सुविधा आगामी अक्टोबर ३१ सम्म लागू हुनेछ। भारतमा सामान्य अवस्थामा चिनी आयातमा १०० प्रतिशत भन्सार शुल्क लाग्ने व्यवस्था छ।
नजिकिँदो चाडपर्वका कारण चिनीको माग अझ बढ्ने अनुमान गरिएको छ। त्यसलाई ध्यानमा राख्दै सरकारले बजारमा आपूर्ति सहज बनाउन ठूलो परिमाणमा चिनी आयातको अनुमति दिएको हो।
समाचार संस्था रोयटर्सका अनुसार भारतले करिब एक दशकपछि पहिलोपटक ठूलो परिमाणमा चिनी आयात गर्न लागेको हो। यस वर्ष चिनीको उत्पादनमा कमी आएपछि आन्तरिक बजारमा आपूर्तिको दबाब बढेको बताइएको छ।
