वीरगञ्ज । वीरगञ्जस्थित नारायणी अस्पतालमा उपचारका क्रममा एक बिरामीको मृत्यु भएपछि चिकित्सकमाथि भएको आक्रमणको आरोपमा प्रहरीले एक जनालाई पक्राउ गरेको छ।
घटनाको वास्तविक अवस्था बुझ्न, परिस्थितिको अनुगमन गर्न तथा आवश्यक समन्वयका लागि स्वास्थ्य तथा खाद्य स्वच्छता मन्त्रालयले प्रतिनिधि टोली वीरगञ्ज पठाएको जनाएको छ।
मन्त्रालयका अनुसार घटनामा संलग्न एक व्यक्तिलाई पक्राउ गरिएको छ भने अन्य संलग्न व्यक्तिहरूको पहिचान र भूमिकाबारे अनुसन्धान जारी रहेको छ। प्रहरीले घटनासम्बन्धी थप अनुसन्धान अगाडि बढाइरहेको जनाएको छ।
गम्भीर मुटुरोगीको आकस्मिक कक्षमा उपचारका क्रममा मृत्यु भएपछि आक्रोशित आफन्त तथा उपस्थित व्यक्तिहरूले अस्पतालमा तोडफोड गरेका थिए। त्यसपछि विवाद समाधानका लागि छलफलमा जाँदै गरेका मेडिकल अफिसर डा. प्रमोद राममाथि आक्रमण भएको बताइएको छ।
