काठमाडौँ । मुस्लिम धर्मावलम्बीहरूको दोस्रो महान् पर्व बकर ईद आज देशभर श्रद्धा, भक्ति र उल्लासका साथ मनाइँदैछ । सरकारले पर्वको अवसरमा आज सार्वजनिक बिदासमेत दिएको छ ।
इस्लाम धर्मावलम्बीहरूले बिहानै स्नान गरी नजिकका मस्जिद तथा इदगाहमा पुगेर सामूहिक नमाज अदा गरेका छन् । नमाजपछि एकअर्काबीच शुभकामना आदानप्रदान गर्ने परम्परा रहेको छ । काठमाडौँस्थित जामे मस्जिद, काश्मीरी मस्जिदलगायत देशभरका मस्जिद र इदगाहमा भक्तजनको उल्लेख्य भीड लागेको छ ।
इदुल फित्र अर्थात् रमजान पर्वको करिब ७० दिनपछि मनाइने बकर ईदलाई त्याग, बलिदान र समर्पणको प्रतीकका रूपमा लिइन्छ । धार्मिक विश्वासअनुसार अल्लाहको आदेशमा नबी इब्राहिमले आफ्ना प्रिय पुत्र इस्माईललाई कुर्बानी दिन तयार भएको घटनाको सम्झनामा यो पर्व मनाउने गरिएको हो ।
मुस्लिम धार्मिक मान्यताअनुसार अल्लाहले इब्राहिमको आस्था र समर्पणको परीक्षा लिएपछि इस्माईलको सट्टा स्वर्गबाट ल्याइएको दुम्बाको कुर्बानी भएको थियो । त्यसयता कुर्बानी दिने परम्परा कायम रहँदै आएको विश्वास गरिन्छ ।
यस अवसरमा मुस्लिम समुदायले धर्मले जायज मानेका जनावरको कुर्बानी दिने प्रचलन छ । कुर्बानी गरिएको मासु तीन भागमा बाँड्ने धार्मिक परम्परा रहेको छ । जसअनुसार एक भाग गरिब तथा विपन्नलाई, अर्को भाग आफन्त तथा इष्टमित्रलाई र तेस्रो भाग आफ्नै परिवारका लागि राख्ने गरिन्छ ।
बकर ईदको अवसरमा मक्का–मदिना पुगेर हज यात्रा गर्नु विशेष पुण्यको कार्य मानिन्छ । हजमा सहभागी हुन नपाएका मुस्लिम धर्मावलम्बीहरूले भने घरमै पर्व मनाउने गरेका छन् ।
