काठमाडौं । आज देशभर विविध कार्यक्रम आयोजना गरी कानुन दिवस मनाइँदैछ । नेपालमा प्रधान न्यायालय स्थापना भएको दिनको सम्झनामा प्रत्येक वर्ष वैशाख २६ गते कानुन दिवस मनाउने गरिन्छ ।
प्रधान न्यायालय ऐन, २००८ जारी भए पनि उक्त ऐन विसं २००९ वैशाख २६ गतेदेखि लागू भएको थियो । सोही दिन राजा त्रिभुवनबाट लालमोहर लागेकाले यस दिनलाई कानुन दिवसका रूपमा मनाउने परम्परा सुरु भएको हो ।
यस वर्ष पनि न्यायपालिकाप्रतिको जनविश्वास अझ सुदृढ बनाउने, न्यायमा सबैको पहुँच सुनिश्चित गर्ने तथा न्यायिक सुशासन प्रवर्द्धन गर्ने उद्देश्यका साथ विभिन्न कार्यक्रम आयोजना गरिएको छ ।
विसं २००७ सालको प्रजातन्त्र स्थापनापछि नेपालमा आधुनिक न्याय प्रणालीको सुरुआत भएको मानिन्छ । प्रधान न्यायालय स्थापना भएसँगै न्यायपालिकालाई कार्यपालिकाबाट पृथक राखी स्वतन्त्र, निष्पक्ष र तटस्थ न्याय प्रणालीको विकासको आधार तयार भएको विश्वास गरिन्छ ।
कानुन दिवसलाई प्रजातन्त्र, मानव अधिकार र विधिको शासन सुदृढ गर्ने महत्वपूर्ण दिनका रूपमा समेत लिने गरिन्छ । यस दिवसले अन्यायमा परेका नागरिकको न्यायिक पहुँच विस्तार गर्नुका साथै न्यायालयप्रतिको सम्मान र विश्वास अभिवृद्धि हुने अपेक्षा गरिएको छ ।
