काठमाडौँ । अमेरिकी राष्ट्रपति डोनाल्ड ट्रम्पले हर्मुज जलघाँटी चाँडै पुनः सञ्चालनमा नआए इरानले गम्भीर परिणाम भोग्नुपर्ने चेतावनी दिएका छन्। उनले अमेरिका, इरान र ओमानबीच जलघाँटी पुनः सञ्चालनका लागि भइरहेको वार्ता सकारात्मक दिशामा अघि बढिरहेको र सम्झौता एक–दुई दिनभित्र हुन सक्ने विश्वास व्यक्त गरेका छन्।
क्यालिफोर्निया भ्रमणका क्रममा फक्स न्युजसँग कुरा गर्दै ट्रम्पले हर्मुज जलघाँटी ‘धेरै चाँडै’ खुल्ने अपेक्षा व्यक्त गरे। उनले जलघाँटी नखुले इरान “धेरै नराम्ररी प्रभावित” हुने चेतावनी दिँदै अन्ततः जलमार्ग सञ्चालनमा आउने दाबी गरे।
ट्रम्पको यो प्रतिक्रिया अमेरिका, इरान र ओमानबीच हर्मुज जलघाँटी पुनः सञ्चालनसम्बन्धी अन्तरिम सम्झौता अन्तिम चरणमा पुगेको र अमेरिकाले बुधबार त्यसको घोषणा गर्न सक्ने एक्सियोसको समाचार सार्वजनिक भएपछि आएको हो।
एयर फोर्स वानमा पत्रकारहरूसँग कुरा गर्दै ट्रम्पले अमेरिका–इरान वार्ता सकारात्मक रहेको उल्लेख गरे। उनले दुवै पक्ष द्वन्द्व अन्त्य गर्ने उपाय खोजिरहेको बताउँदै सम्झौता ‘भोलि वा पर्सिसम्म’ हुन सक्ने विश्वास व्यक्त गरे। “कार्य नै सबैभन्दा महत्त्वपूर्ण हो। उनीहरू सम्झौता गर्न चाहन्छन्, अब के हुन्छ हेर्दै जाऔँ,” ट्रम्पले भने।
