काठमाडौँ । सुनसरीको देवानगञ्जमा भएको गोलीकाण्डमा घाइते भएका अर्का एक युवकको उपचारका क्रममा निधन भएको छ।
देवानगञ्ज गाउँपालिका–३ का २१ वर्षीय रवीन्द्रकुमार मेहताको काठमाडौंस्थित त्रिवि शिक्षण अस्पताल महाराजगञ्जमा उपचारका क्रममा मृत्यु भएको हो।
मेहताको बायाँ तिघ्रामा गोली लागेको थियो। प्रारम्भिक उपचारपछि उनलाई विराट नर्सिङ होमबाट थप उपचारका लागि शुक्रबार काठमाडौं लगिएको थियो। उपचारकै क्रममा उनको निधन भएको अस्पताल स्रोतले जनाएको छ।
रवीन्द्रकुमारको निधनसँगै सुनसरी घटनामा प्रहरीको गोली लागेर ज्यान गुमाउनेको संख्या तीन पुगेको छ। यसअघि देवानगञ्ज–४ का २५ वर्षीय ओमप्रकाश मेहताको घटनाकै दिन मृत्यु भएको थियो भने देवानगञ्ज–३ का २२ वर्षीय जयप्रकाश मेहताको उपचारका क्रममा बिहीबार विराटनगरस्थित न्युरो अस्पतालमा निधन भएको थियो।
उक्त घटनापछि उत्पन्न तनावका क्रममा सिरहामा पनि गोली लागेर एक जनाको ज्यान गएको प्रहरीले जनाएको छ।
