काठमाडौँ । नेप्से परिसूचक आज सोमबार २७.८५ अंकले बढेर २७८६.३५ विन्दुमा पुगेको छ । आजको कारोबारमा बजारमा सकारात्मक माहोल देखिएको छ ।
नेपाल स्टक एक्सचेञ्जका अनुसार आज ३४२ कम्पनीका १ करोड ४५ लाख ४० हजार २२ कित्ता शेयर किनबेच हुँदा कुल ५ अर्ब ९८ करोड ६४ लाख १२ हजार ६०० रुपैयाँ बराबरको कारोबार भएको हो ।
आज म्युचुअल फण्ड बाहेक सबै उपसूचक हरियो भएका छन् । बजारमा जलविद्युत, बैंकिङ, विकास बैंक, होटल तथा अन्य समूहमा लगानीकर्ताको आकर्षण देखिएको थियो ।
कारोबारका क्रममा थ्री स्टार हाइड्रोपावरको शेयर मूल्य सबैभन्दा बढी ९.०१ प्रतिशतले बढेको छ भने सुपर खुदी हाइड्रोपावरको शेयर ८.३२ प्रतिशतले उकालो लागेको छ ।
यता, बुंगल हाइड्रोपावरका लगानीकर्ताले भने सबैभन्दा बढी घाटा व्यहोरेका छन् । कम्पनीको शेयर मूल्य आज १०.३२ प्रतिशतले घटेको छ ।
कारोबार रकमका आधारमा अन्खु खोला जलविद्युत कम्पनी अग्रस्थानमा रह्यो । कम्पनीको ६० करोड २० लाख रुपैयाँभन्दा बढीको शेयर कारोबार भएको छ । त्यस्तै, रिडी पावर कम्पनीको ३० करोड १७ लाख रुपैयाँ बराबरको कारोबार भएको छ ।
